ZONJ ALKAEDA

Dy vjet më parë, një grup zyrtarësh nga siguria kombëtare e Shteteve të Bashkuara mori një propozim nga zyrtarët e Pakistanit. Nëse Shtetet e Bashkuara do të pranonin të lironin nga grua pakistaneze, e cila vuante një dënim të gjatë në një burg të Teksasit për vrasje të mbetur në tentativë, Islamabadi do të lironte oficerin e ushtrisë amerikane Bowe Bergdahl, i cili ishte zhdukur që në vitin 2009 dhe mendohej se mbahej i burgosur nga forcat talebane në Pakistan. Sipas zyrtarëve aktualë e atyre të mëparshëm amerikanë, të cilët janë në dijeni të ofertës, këshilltarët për sigurinë kombëtare të Presidentit Barack Obama e refuzuan ashpër shkëmbimin. Lirimi i të burgosurës, Aafia Siddiqui, e cila ka lidhje të ngushta me Al-Kaedën dhe është dënuar në vitin 2010 për tentativën e vrasjes së disa amerikanëve në Afganistan, do të binte ndesh me politikën e administratës për të mos negociuar me grupet terroriste. Një veprim i tillë do të linte gjithashtu të lirë një luftëtare tepër të rrezikshme. 42-vjeçarja, Siddiqui, e cila njihet në rrethin e kundërterrorizmit si “Zonja Al-Kaeda”, ka patur lidhje me liderin e grupit të 11 shtatorit, Khalid Sheikh Mohammed dhe dikur ka qenë në listën e terroristëve më të kërkuar të FBI-së.
Siddiqui është shkolluar në Shtetet e Bashkuara. Ka studiuar në Universitetin M.I.T dhe ka marrë doktoraturën në Brandeis. Ajo është arrestuar në vitin 2008 në Afganistan dhe i është gjetur cianid sodiumi me vete, gjithashtu edhe disa dokumente kur përshkuhej procedura për të krijuar armë kimike, bomba të pista, si dhe mënyrën e përhapjes së Ebolës. Kur FBI-ja dhe zyrtarët e ushtrisë u përpoqën të merrnin në pyetje Siddiquin, ajo rrëmbeu një armë që ndodhej në tavolinë dhe qëlloi kundër tyre.